Mae Cymdeithas Bêl-droed Cymru (FAW) yn falch iawn o gyhoeddi bod Caerdydd wedi’i dewis i gynnal Rownd Derfynol Cynghrair Pencampwyr Merched UEFA 2029, gan ddod ag un o achlysuron mwyaf pêl-droed clybiau menywod i Stadiwm Cenedlaethol Cymru.
Cyflwynodd yr FAW gais technegol cryf i UEFA, a ddatblygwyd gyda chefnogaeth Llywodraeth Cymru, Cyngor Caerdydd, Maes Awyr Caerdydd a Stadiwm Cenedlaethol Cymru. Dangosodd y cais allu Cymru i gynnal Rownd Derfynol Cynghrair Pencampwyr Merched UEFA o safon fyd-eang, ochr yn ochr ag uchelgais ar y cyd i ddefnyddio’r digwyddiad i greu effaith barhaol i bêl-droed, cymunedau a’r genedl ehangach.
Mae’r cais llwyddiannus yn cynrychioli carreg filltir arall i bêl-droed Cymru a bydd yn darparu llwyfan i gyflymu twf parhaus pêl-droed menywod a merched ledled Cymru.
Wrth wraidd cais yr FAW roedd ymrwymiad i sicrhau y byddai cynnal y rownd derfynol yn creu effaith a fyddai’n ymestyn ymhell y tu hwnt i’r digwyddiad ei hun ac ar draws Cymru gyfan.
Bydd cynnal Rownd Derfynol Cynghrair Pencampwyr Menywod UEFA yn adeiladu ar gyfnod trawsnewidiol i gêm y menywod yng Nghymru, gyda chyfranogiad wedi dyblu i fwy nag 20,000 o chwaraewyr cofrestredig, presenoldeb uwch nag erioed mewn pêl-droed domestig a rhyngwladol, datblygiad parhaus y Genero Adran Leagues a ymgyrch rhagbrofol hanesyddol Cymru ar gyfer UEFA EURO Menywod 2025.
Bydd y rownd derfynol yn rhoi cyfle arall i ysbrydoli cenhedlaeth newydd o fenywod a merched i weld pêl-droed fel gêm iddyn nhw – fel chwaraewyr, hyfforddwyr, dyfarnwyr, gwirfoddolwyr, cefnogwyr ac arweinwyr.
Bydd hefyd yn rhoi llwyfan byd-eang i Gymru arddangos ei phêl-droed, ei diwylliant, ei hiaith a’i hunaniaeth, wrth groesawu cefnogwyr o bob rhan o Ewrop i galon prifddinas Cymru.
Etifeddiaeth barhaol i bêl-droed Cymru
Uchelgais yr FAW yw i Rownd Derfynol Cynghrair Pencampwyr Menywod UEFA 2029 fod yn gatalydd ar gyfer cam nesaf twf pêl-droed menywod a merched yng Nghymru.
Bydd rhaglen etifeddiaeth gynhwysfawr yn dechrau cyn y rownd derfynol ac yn parhau y tu hwnt i 2029, gydag ymrwymiadau’n canolbwyntio ar gyfranogiad, cyfleusterau, gweithlu pêl-droed a thyfu’r gynulleidfa ar gyfer gêm y menywod.
Bydd uchelgeisiau’r rhaglen yn cynnwys:
- Creu mwy o gyfleoedd i ferched chwarae pêl-droed – gweithio tuag at sicrhau bod 100% o ysgolion uwchradd Cymru yn darparu cyfleoedd pêl-droed cwricwlaidd a/neu allgyrsiol i ferched, gan dargedu gostyngiad o 25% yn nifer y merched yn eu harddegau sy’n gadael y gêm. Bydd y rhaglen yn canolbwyntio’n benodol ar merched rhwng 12 ac 16 oed ac ar greu llwybrau cynaliadwy rhwng ysgolion, cymunedau a chlybiau.
- Cyrraedd mwy o fenywod a merched o gymunedau sydd heb gynrychiolaeth ddigonol – datblygu cyfleoedd mewn cymunedau ethnig amrywiol ac ardaloedd sy’n profi amddifadedd, gyda’r uchelgais o gynyddu cyfranogiad ymhlith merched yn eu harddegau o gymunedau ethnig amrywiol 25%. Bydd fformatau hyblyg a hamdden hefyd yn cael eu hehangu, gyda’r nod o ddyblu nifer y menywod sy’n chwarae pêl-droed hamdden.
- Creu lleoedd gwell i fenywod a merched chwarae – buddsoddi mewn pedwar cae artiffisial maint llawn ledled Cymru gyda mynediad wedi’i ddiogelu i fenywod a merched, ochr yn ochr â 15 o brosiectau datblygu cyfleusterau sy’n addas i fenywod. Trwy ddull Environments FOR HER, bydd y gwelliannau’n cynnwys cyfleusterau newid, darpariaeth toiledau a chyfleusterau penodol i ddyfarnwyr benywaidd, gyda’r nod o wella profiadau o leiaf 1,000 o chwaraewyr.
- Tyfu gweithlu benywaidd pêl-droed a datblygu arweinwyr y dyfodol – cynyddu nifer y menywod sy’n gwirfoddoli ar draws pêl-droed Cymru 25%, wrth greu mwy o gyfleoedd i fenywod symud ymlaen ym meysydd hyfforddi, dyfarnu, llywodraethu ac arweinyddiaeth o fewn clybiau, cynghreiriau a sefydliadau pêl-droed.
- Tyfu’r gynulleidfa ar gyfer pêl-droed menywod – defnyddio proffil Rownd Derfynol Cynghrair Pencampwyr Menywod UEFA i gynyddu ymwybyddiaeth a chefnogaeth i Dîm Cenedlaethol Menywod Cymru a’r Adran Leagues. Bydd y rhaglen etifeddiaeth yn targedu cynnydd o 30% yng ngwerthiant tocynnau a phresenoldeb yn yr Adran Leagues, ochr yn ochr â mwy o ymgysylltu digidol, sylw yn y cyfryngau a diddordeb yn y gêm ddomestig.
- Mynd â’r rownd derfynol ar draws Cymru – cysylltu cymunedau â’r digwyddiad drwy weithgarwch ar lawr gwlad, rhaglenni ysgolion a chlybiau, cynnwys ac adrodd straeon, profiadau cefnogwyr a thaith tlws Cynghrair Pencampwyr Menywod UEFA, gan sicrhau bod cynnal y rownd derfynol yn cael effaith y tu hwnt i Gaerdydd.
Gyda’i gilydd, mae’r ymrwymiadau hyn wedi’u cynllunio i sicrhau bod effaith Rownd Derfynol Cynghrair Pencampwyr Menywod UEFA yn cael ei theimlo ledled Cymru ac yn parhau ymhell ar ôl i’r tlws gael ei godi.
Llwyfan o safon fyd-eang yng nghanol Caerdydd
Bydd Stadiwm Cenedlaethol Cymru yn darparu lleoliad eiconig ar gyfer y rownd derfynol, yng nghanol un o brifddinasoedd mwyaf cryno a hygyrch Ewrop.
Mae ei leoliad yng nghanol y ddinas yn creu profiad unigryw ar gyfer digwyddiad mawr, gyda gorsaf Caerdydd Canolog, gwestai, bwytai, atyniadau diwylliannol a gweithgareddau i gefnogwyr oll o fewn cyrraedd hawdd i’r stadiwm.
Bydd ôl troed cryno’r ddinas yn galluogi cefnogwyr i brofi awyrgylch y rownd derfynol ledled Caerdydd ac yn cefnogi’r uchelgais i ddarparu digwyddiad hygyrch a chynaliadwy.
Mae gan Gaerdydd hefyd hanes profedig o gynnal rhai o achlysuron mwyaf chwaraeon y byd.
Croesawodd y ddinas Rownd Derfynol Cynghrair Pencampwyr Menywod UEFA yn 2017, pan drechodd Lyon Paris Saint-Germain yn Stadiwm Dinas Caerdydd, tra cynhaliodd Stadiwm Cenedlaethol Cymru Rownd Derfynol Cynghrair Pencampwyr UEFA y dynion rhwng Real Madrid a Juventus ychydig ddyddiau’n ddiweddarach.
Roedd cais 2029 yr FAW yn cydnabod yr effaith a gafodd rownd derfynol y merched yn 2017 wrth ysbrydoli menywod a merched ledled Cymru. Ddeuddeg mlynedd yn ddiweddarach, yr uchelgais yw defnyddio dychweliad y rownd derfynol i greu etifeddiaeth hyd yn oed yn fwy.
Cymru: cartref i ddigwyddiadau pêl-droed mawr
Bydd Rownd Derfynol Cynghrair Pencampwyr Menywod UEFA 2029 yn parhau cyfnod eithriadol i Gymru fel gwlad sy’n cynnal pêl-droed rhyngwladol mawr.
Yn dilyn cynnal Pencampwriaeth Ewropeaidd Dan-19 UEFA yn 2026, bydd Caerdydd yn croesawu UEFA EURO 2028 i Stadiwm Cenedlaethol Cymru, gan gynnwys gêm agoriadol y twrnamaint a gêm rownd yr wyth olaf.
Yna, gallai Cymru chwarae rhan sylweddol wrth gynnal Cwpan y Byd Menywod FIFA yn 2035. Mae’r FAW wedi ymuno â Chymdeithasau Pêl-droed Lloegr, Gogledd Iwerddon a’r Alban i gyflwyno cais ar y cyd gan y DU ar gyfer y twrnamaint, gyda Chaerdydd a Wrecsam ymhlith y dinasoedd cynnal arfaethedig. Y DU yw’r unig ymgeisydd ar gyfer twrnamaint 2035, gyda disgwyl i FIFA benodi’r gwesteiwr yn ffurfiol yn ddiweddarach yn 2026.
Felly, bydd Rownd Derfynol Cynghrair Pencampwyr Menywod UEFA yn 2029 yn rhan o raglen gynyddol arwyddocaol o bêl-droed rhyngwladol mawr yng Nghymru, gan gryfhau ymhellach enw da’r genedl am gynnal digwyddiadau o safon fyd-eang a chreu etifeddiaethau ystyrlon ohonynt.
I’r FAW, mae cynnal y rownd derfynol hefyd yn rhoi cyfle i gynyddu proffil Tîm Cenedlaethol Menywod Cymru a’r Adran Leagues, gan ddefnyddio adrodd straeon, gweithgareddau cymunedol, taith tlws, digwyddiadau ar lawr gwlad a phrofiadau cefnogwyr i gysylltu Cynghrair Pencampwyr Menywod UEFA â chymunedau pêl-droed ledled Cymru.
Arddangos Cymru i’r byd
Bydd miloedd o gefnogwyr sy’n teithio i Gaerdydd yn creu cyfleoedd sylweddol i dwristiaeth ac economi ehangach Cymru.
Gan weithio ochr yn ochr â Llywodraeth Cymru a phartneriaid, bydd y digwyddiad yn darparu llwyfan i arddangos Cymru’n rhyngwladol, gyda diwylliant Cymru wrth galon y profiad a rhaglen wedi’i chynllunio i gynyddu amlygrwydd a hygyrchedd pêl-droed menywod.
Dywedodd Noel Mooney, Prif Weithredwr yr FAW: “Mae hyn yn ymwneud â llawer mwy nag un noson yn 2029. Ein huchelgais yw i Rownd Derfynol Cynghrair Pencampwyr Menywod UEFA fod yn gatalydd ar gyfer trawsnewid parhaus pêl-droed menywod a merched yng Nghymru.
“Rydyn ni eisiau i ferch ifanc sy’n gwylio chwaraewyr gorau Ewrop yn Stadiwm Cenedlaethol Cymru weld bod lle iddi hi yn ein gêm – boed hynny fel chwaraewr, hyfforddwr, dyfarnwr, gwirfoddolwr, cefnogwr neu arweinydd y dyfodol.
“Mae pêl-droed Cymru wedi gwneud cynnydd anhygoel. Mae gennym fwy nag 20,000 o fenywod a merched yn chwarae’r gêm, strwythur domestig sy’n tyfu drwy’r Adran Leagues a thîm Cymru sydd bellach wedi cystadlu ar lwyfan twrnamaint mawr. Mae dod â’r rownd derfynol hon i Gymru yn rhoi cyfle arall i ni gyflymu’r cynnydd hwnnw.
“Mae Stadiwm Cenedlaethol Cymru, yng nghanol Caerdydd, yn darparu llwyfan gwych ar gyfer un o’r gemau mwyaf ym mhêl-droed clybiau menywod. Rydyn ni eisiau i gefnogwyr sy’n teithio yma o bob rhan o Ewrop brofi nid yn unig rownd derfynol o safon fyd-eang, ond popeth sy’n gwneud Cymru yn genedl bêl-droed mor unigryw – ein pobl, ein diwylliant, ein hiaith a’n hangerdd dros y gêm.
“Yn bwysicaf oll, rydyn ni eisiau i etifeddiaeth 2029 fod yn amlwg am flynyddoedd wedyn – mewn cyfleusterau gwell, mwy o gyfleoedd, clybiau cryfach, cynulleidfaoedd mwy a llawer mwy o fenywod a merched yn teimlo bod pêl-droed yn perthyn iddyn nhw.”
Dywedodd Bethan Woolley, Pennaeth Pêl-droed Menywod a Merched yr FAW: “Mae cynnal Rownd Derfynol Cynghrair Pencampwyr Menywod UEFA yng Nghymru yn rhoi cyfle anhygoel i ni adeiladu ar y momentwm rydyn ni wedi’i greu ar draws gêm y menywod a merched.
“Rydyn ni wedi gweld twf sylweddol mewn cyfranogiad yn ystod y blynyddoedd diwethaf, ond mae ein huchelgais yn mynd ymhellach o lawer. Rydyn ni eisiau creu
mwy o gyfleoedd i fenywod a merched chwarae, gwella’r amgylcheddau a’r cyfleusterau maen nhw’n eu profi, cryfhau llwybrau drwy’r gêm a sicrhau bod mwy o fenywod yn gallu gweld lle iddyn nhw eu hunain mewn pêl-droed – boed hynny fel chwaraewr, hyfforddwr, dyfarnwr, gwirfoddolwr neu arweinydd.
“Bydd cael rhai o chwaraewyr a chlybiau gorau’r byd yn cystadlu yn Stadiwm Cenedlaethol Cymru yn hynod ysbrydoledig, yn enwedig i’r genhedlaeth nesaf. Ein her ni nawr yw manteisio ar y cyffro hwnnw a’i droi’n gyfranogiad parhaol yn y gêm.
“Ni fydd gwir fesur llwyddiant yn ymwneud â’r hyn sy’n digwydd ar noson y rownd derfynol yn 2029 yn unig, ond â’r cyfleoedd y bydd yn eu creu i fenywod a merched ledled Cymru am flynyddoedd lawer wedi hynny.”
Bydd y rhaglen etifeddiaeth yn cael ei chyflwyno gan yr FAW mewn cydweithrediad â phartneriaid gan gynnwys Sefydliad Pêl-droed Cymru, Llywodraeth Cymru, Chwaraeon Cymru, Awdurdodau Lleol, yr Adran Leagues a chlybiau ar lawr gwlad, gan sicrhau bod manteision cynnal y rownd derfynol yn ymestyn ar draws Cymru gyfan.
Bydd rhagor o wybodaeth am Rownd Derfynol Cynghrair Pencampwyr Menywod UEFA 2029, gan gynnwys tocynnau, gweithgareddau i gefnogwyr a’r rhaglen etifeddiaeth genedlaethol, yn cael ei chyhoeddi maes o law.
