Mae Chris Gunter wedi’i benodi’n Brif Hyfforddwr Cymru D19 ar gyfer gweddill tymor 2025/26, a fydd yn arwain y tîm ym Mhencampwriaeth UEFA EURO D19 a fydd yn cymryd lle yng ngogledd Cymru dros yr haf.
Yn ddeiliad Trwydded Pro UEFA, mae Gunter yn dod â chyfoeth o brofiad rhyngwladol i’r swydd yn dilyn gyrfa chwarae o 15 mlynedd gyda Cymru, pan enillodd 109 cap rhyngwladol.
Roedd Gunter yn rhan allweddol o dîm Chris Coleman a enillodd calonau’r genedl drwy gyrraedd rownd gyn-derfynol UEFA EURO 2016. Chwaraeodd Gunter bob munud o’r chwe gêm yn y pencampwriaeth, gan chwarae’r groesiad perffaith ar gyfer peniad Sam Vokes yn y fuddugoliaeth enwog 3-1 yn erbyn Gwlad Belg yn y rownd wyth olaf.
Enillodd y cyn-amddiffynnwr ei cap gyntaf dros Gymru yn 2007 pan oedd yn 17 oed, ac aeth ymlaen i gynrychioli ei wlad mewn tair pencampwriaeth rhyngwladol, a gyrraedd y camp o fod y chwaraewr dynion cyntaf i ennill 100 cap dros Gymru.
Yn dilyn ei ymddeoliad o chwarae ym mis Mawrth 2023, ymunodd Gunter â tîm hyfforddi y Tîm Cenedlaethol Dynion, pan fethodd Cymru o drwch blewyn ar sicrhau lle ym Mhencampwriaeth UEFA EURO 2024. Yn ystod y cyfnod hynny, gweithiodd Gunter ar ddatblygu talent ifanc o fewn tîm cenedlaethol.
Penodwyd Gunter yn brif hyfforddwr Cymru D19 ym mis Awst 2024 cyn cymryd gofal o’r garfan D17 llynedd. Fel cynnyrch o system grwpiau oedran Cymru ei hun, mae Gunter wedi cynrychioli Cymru ar lefelau D17, D19 a D21. Bydd bellach yn arwain Cymru ym Mhencampwriaeth UEFA EURO D19 yr haf hwn, digwyddiad hanesyddol i bêl-droed Cymru a gynhelir yn y gogledd.
Bydd Gunter yn cymryd gofal o’r tîm yn ystod ffenestr ryngwladol FIFA ym mis Mawrth ac yn y twrnamaint terfynol yr haf hwn. Bydd hefyd yn parhau yn ei rôl fel Prif Hyfforddwr y garfan MU17 wrth iddynt baratoi ar gyfer gemau rhagbrofol Grŵp B UEFA U17 EURO yn San Marino ym mis Ebrill.
Wrth siarad am ei benodiad, dywedodd Gunter: “Rwy’n falch iawn o fod yn arwain y grŵp hwn i’r twrnamaint terfynol. Rwyf wedi gweithio gyda nifer o’r chwaraewyr o’r blaen, ac mae gwybod pa mor dda y gallant fod yn rhoi cyffro mawr i mi.
“Mae cynrychioli eich gwlad bob amser yn anrhydedd enfawr, ac i wneud hynny mewn pencampwriaeth derfynol EURO fydd yn brofiad arbennig i bawb sy’n gysylltiedig.
“Mae cynnal y twrnamaint yn dangos ble mae pêl-droed Cymru arni a’r gwaith sydd wedi mynd i mewn iddo. Gyda’r gefnogaeth anhygoel a gawn ym mis Mehefin, ni allaf aros i weld y chwaraewyr yn perfformio ar y lefel uchaf.”
Ychwanegodd Prif Swyddog Pêl-droed yr FAW, Dr David Adams: “Mae cynnal twrnamaint terfynol gyda grŵp o chwaraewyr talentog yn fantais fawr wrth ddatblygu rhyngwladolwyr Cymru’r dyfodol, fel y gwelwyd pan gymhwysodd ein carfanau MU17 yn 2022 a 2023.
“Mae Chris wedi dangos yn ystod ei gyfnod gyda ni fod ganddo’r gallu i greu amgylchedd ffyniannus, tra hefyd yn arwain a datblygu chwaraewyr talentog. Rydym yn hyderus y bydd y twrnamaint hwn yn llwyddiant ac yn gadael etifeddiaeth barhaol i bêl-droed Cymru.”
