Bydd tîm Cymru Rhian Wilkinson yn teithio i Sbaen i wynebu’r Swistir mewn gêm gyfeillgar ryngwladol yn ystod y ffenestr ryngwladol olaf o’r flwyddyn.
Bydd y gêm yn cael ei chynnal ar ddydd Mawrth 2 Rhagfyr, gyda’r gic gyntaf am 11:00yb GMT / 12:00yp CET yn Stadiwm Chapín (Estadio Municipal de Chapín) yn Jerez de la Frontera, Sbaen. Mae’r Swistir wedi’u rhestru yn 24ain yn y byd, wyth lle uwchben Cymru sy’n 32ain ar hyn o bryd.
Cynhaliodd y Swistir UEFA EWRO Menywod am y tro cyntaf yn yr haf ac aethant ymlaen i’r rownd chwarter olaf o’r gystadleuaeth.
Y tro diwethaf i’r ddau dîm gwrdd oedd yng ngemau ail gyfle Cwpan y Byd ym mis Hydref 2022. Collodd Cymru 2-1, gyda Fabienne Humm yn sgorio’r gôl fuddugol i’r Swistir yn eiliadau olaf y gêm, er i Rhiannon Roberts roi Cymru ar y blaen yn gynharach.
Bydd y gêm hon yn helpu paratoadau Cymru ar gyfer rowndiau rhagbrofol Cwpan y Byd Menywod FIFA 2027, a fydd yn cael eu cynnal y flwyddyn nesaf. Bydd Cymru, sydd yn Grŵp 1 o Gynghrair B, yn wynebu Czechia, Albania a Montenegro.
Mae ail gêm yn cael ei threfnu ar gyfer nos Wener 28 Tachwedd, hefyd yn Sbaen. Bydd y gwrthwynebwyr a’r lleoliad yn cael eu cadarnhau cyn bo hir.
Bydd gwybodaeth tocynnau yn cael ei rhyddhau cyn bo hir.
